“त्यो आधा तिम्रो अनि त्यो आधा मेरो । हेर, जिवनमा जुनसुकै ठाउँमा पुगेपनि त्यस बेला मलाई साथमा पाएनौ भने खोजि हेर्नु म तिमी सँगैको आकाशमा हुनेछु ।” – सुजुको काखमा शिर राखेर सुतिरहेको राजले आकाश तिर औँला तेर्स्याउँदै बोलेको थियो ।
अहिले बन्न लागेको नयाँ राज्यको पुरानो बासिन्दा राज र केहि पुस्ता अगाडी बसाईँ सराई आएका सुजुको परिवार ।
जातले पुरै फरक तर एकअर्काको संस्कृती र रितीरिवाजमा मज्जैले घुलेका उनीहरुले आजसम्म कहिले पनि जातीयताको बारेमा सोचेनन् । साँच्चै भन्दा उनीहरु दुवैलाई आफ्नो भन्दा पनि अर्काको संस्कृती अनि रितीरिवाज मन पर्थ्यो ।
एकअर्काको धर्म, चाडवाड, रितीरिवाज सबै मज्जाले बाँड्दै एकै दाजुभाई अनि एकै परिवार बनेर बसेका यस्तै यस्तै राज अनि सुजुका परिवार आतङ्कित छन् आजकल । चुच्चो नाक र थेप्चो नाकले सिमाना छुट्टयाएको छ अहिले । हिजो थेप्चो नाकवाला राजहरुले चुच्चो नाकवाला सुजुहरुको परिवार लाई आक्रमण गर्यो रे अनि अस्ति चुच्चो नाकले थेप्चो नाकलाई गाली गर्यो रे ?
राजहरु सुजुहरुका विरुद्ध सडकमा आगो ओकल्दैछन् "बाहुन छेत्री काटिन्छ , तातो रगत चाटिन्छ !!!" जस्ता घिनलाग्दा नारा घन्काएर अनि सुजुहरु राजहरुका विरुद्ध मनमा ।
सुजु चुपचाप आकाश तिर हेर्छे समय कस्तो बदलिएछ । उनीहरुले भाग लगाएको आकाशमा डढेलो लागेको छ । भयावह अनि कुरुप देखिएको छ आकाश ।
यो पक्कै पनि राम्रो लक्षण हैन .......................
सबैको मङ्गल होस् ।
No comments:
Post a Comment
Thank You very much. Raj